ദോഹ: ഹോർമുസ് പ്രതിസന്ധിക്ക് പിന്നാലെ, ഇന്ത്യയുടെ ഏറ്റവും വലിയ എൽപിജി (LPG) വിതരണക്കാരായി ഗൾഫ് രാജ്യങ്ങളെ പിന്തള്ളി അമേരിക്ക മുന്നിലെത്തിയതായി ടൈംസ് ഓഫ് ഇന്ത്യ റിപ്പോർട്ട് ചെയ്തു.

2026 ജനുവരിക്കും ജൂലൈയ്ക്കുമിടയിൽ അമേരിക്ക ഇന്ത്യയ്ക്ക് 3.6 ദശലക്ഷം ടൺ എൽപിജി (LPG) നൽകി.

അതേസമയം ഇതേ കാലയളവിൽ, യുഎഇ, സൗദി അറേബ്യ, ഖത്തർ, കുവൈറ്റ് എന്നിവിടങ്ങളിൽ നിന്നുള്ള ആകെ ഇറക്കുമതി 5.3 ദശലക്ഷം ടൺ മാത്രമായിരുന്നു.

ഇറാൻ-യുഎസ് യുദ്ധത്തിന് മുമ്പ്, ഇന്ത്യ ഇറക്കുമതി ചെയ്തിരുന്ന എൽപിജിയിൽ 90 ശതമാനത്തോളവും ഹോർമുസ് കടലിടുക്ക് വഴി ഗൾഫ് രാജ്യങ്ങളിൽ നിന്നായിരുന്നു.

ഗൾഫ് മേഖലയിൽ നിന്നുള്ള ഇറക്കുമതി തടസ്സപ്പെട്ടതിനെത്തുടർന്ന്, ഇന്ത്യയിലേക്ക് എൽപിജി (LPG) വിതരണം ചെയ്യുന്ന ഏറ്റവും വലിയ ഒറ്റരാജ്യമായി അമേരിക്ക മാറി.

ഈ വർഷം ജനുവരിയിൽ 12 ശതമാനം മാത്രമായിരുന്നു ഇന്ത്യയുടെ എൽപിജി (LPG) ഇറക്കുമതിയിൽ അമേരിക്കയുടെ വിഹിതം. എന്നാൽ ജൂലൈയിൽ അമേരിക്കയുടെ വിഹിതം 73 ശതമാനമായി ഉയർന്നു.

ഇതേ കാലയളവിൽ, യുഎഇയുടെ വിഹിതം 37 ശതമാനത്തിൽ നിന്ന് 8.2 ശതമാനമായും, ഖത്തറിന്റെ വിഹിതം 18.7 ശതമാനത്തിൽ നിന്ന് 1.5 ശതമാനമായും, കുവൈറ്റിന്റെ വിഹിതം 15 ശതമാനത്തിൽ നിന്ന് 2.69 ശതമാനമായും കുറഞ്ഞു.

ജൂലൈ മാസത്തിൽ അമേരിക്കയ്ക്കും ഗൾഫ് രാജ്യങ്ങൾക്കും പുറമെ ഇറാൻ, ഒമാൻ, ഇറാഖ്, അർജന്റീന, അൾജീരിയ എന്നിവിടങ്ങളിൽ നിന്നും ഇന്ത്യ എൽപിജി ഇറക്കുമതി ചെയ്തു.

ഇറാനുമായുള്ള യുദ്ധം തുടങ്ങുന്നതിലൂടെ അമേരിക്ക ലക്ഷ്യമിട്ട പ്രധാന കാര്യങ്ങളിലൊന്ന് ഗൾഫ് രാജ്യങ്ങളെ പ്രതിസന്ധിയിലാക്കിയ ശേഷം തങ്ങളുടെ എണ്ണ, വാതക കയറ്റുമതി വർദ്ധിപ്പിക്കുക എന്നതായിരുന്നു എന്ന് ചില റിപ്പോർട്ടുകളുണ്ടായിരുന്നു.